СПРАВЫ Ў СЛАВУ

{jcomments on}Чарговая сустрэча ў інфармацыйна-асветным цэнтры храма іконы Божай Маці “Спатоленне пагіблых” была прысвечана імянінніцам чэрвеня.

Не ўсе, аб кім вялася размова, прысутнічалі на “Дні Анёла”, але кожны ўдзельнік традыцыйнай сустрэчы імкнуўся данесці да астатніх значнасць асобы, якую прыгадваў. І хаця ў расповядах пераважала ваенная тэма, падкрэсліваючы сум аб загінуўшых на Вялікай Айчыннай, яны выклікалі светлае пачуццё духам вызвалення ад фашысцкай навалы, 70-годдзе якога святкуе наша краіна.

---

Увесь праваслаўны свет шануе Полацкую святую. Ефрасіння азначае “радасць”. Але шмат бядот прыпала на лёс Ефрасінні Фёдараўны Раковіч з вёскі Красная Воля. У час акупацыі немцы расстралялі яе мужа, пакінуўшы шасцёра сірот. Тым часам у швагера ад тыфу памерла жонка, якая прасіла яго не пакінуць “Проську” – так вяскоўцы скарацілі велічнае імя. Злучыліся “два адзіноцтвы”, якім Бог падарыў і сумесных дзяцей. І хаця хапіла праблем у шмадзетнай сям’і, але памяць аб загінуўшых і клопат аб жывых дапамог пераадолець жыццёвыя выпрабаванні.

Цікава, што Пелагея – цёзка з Марынай. Першае – у перакладзе з грэчаскай мовы, другое – з лацінскай абазначаюць “марская”. У вёсцы Дрэбск ведаюць Пелагею Лазараўну Альцывановіч. На фронце загінулі бацькі і яе, і мужа. Абяздоленыя лёсам людзі сумленна працавалі ў калгасе, ствараючы сямейны дабрабыт. Паставілі на ногі трох добрых дочак. Не маючы дзедаў ні па маме, ні па тату, тыя сваіх дзяцей выхавалі ў павазе да найвялікшай каштоўнасці – прадстаўнікоў старэйшага пакалення.

Вядома, што сакратар раённага савета ветэранаў працы ўстаноў аховы здароўя Эма Васільеўна Шалік у хрышчэнні атрымала імя Алена, што азначае “факел”. Яе бацька загінуў на фронце. І хаця рознае здаралася на няпростым жыццёвым шляху, яна, адпавядаючы свайму імя, нясе святло людзям. Дапамагала малышам і мамам, працуючы старшай сястрой дзіцячага аддзялення бальніцы. Цяпер клапоціцца аб былых медыках, выконваючы грамадскія абавязкі. А ў Полацкім Свята-Ефрасіннеўскім манастыры аказалася запатрабаваным майстэрства лунінчанкі – яе вязаныя вырабы саграваюць сясцёр абіцелі.

Любая добрая справа аддзячваецца павагай навакольных. Аб гэтым сведчыць духоўная дзейнасць нашага сучасніка, стваральніка манастыроў у Закарпацці, які ў ХХІ стагоддзі праслаўлены як святы Іаў Угольскі. Памяць яго адзначаецца 28 чэрвеня. Многія імяніннікі месяца ў гэты дзень наведаюць храм і паклоняцца часцінцы мошчаў прападобнага, што прывезены з Кіева-Пячэрскай лаўры.