КНІГІ ПЕСНЯРА – У БІБЛІЯТЭЦЫ ЕПАРХІІ

Архіерэй Пінскі і Лунінецкі Сцяфан наведаў у Мінску мемарыяльны дом-музей Якуба Коласа і сям’ю нашчадкаў класіка нацыянальнай літаратуры.

Азнаёміўшыся з экспазіцыяй, прысвечанай біяграфічным старонкам пісьменніка, Уладыка даўжэй затрымаўся на другім паверсе. Тут захаваўся той жа інтэр’ер, як пры жыцці Канстанціна Міхайлавіча Міцкевіча, – і ў вялікай гасцёўні з рарытэтнай мэбляю, і ў сціпла абсталяваным кабінеце, дзе аудыязапіс дадае натуральныя гукі апошніх імгненняў зямнога шляху Якуба Коласа.

Але вось ужо амаль 60 год пасля жывуць яго творы, жыве імя песняра, якое прыцягвае да маляўнічай сядзібы паблізу Нацыянальнай Акадэміі навук людзей рознага ўросту і з розных краін. Дарэчы, разам з Уладыкам домам-музеем захапляўся аспірант Мінскай духоўнай акадэміі Аца Будзішын з Сербіі. У знак удзячнасці ён праспяваў нескалькі песень на роднай мове, якую лічыць вельмі блізкай да беларускай…

У двары захаваліся чатыры з пяці дрэў, што ў свой час пасадзіў гаспадар у гонар сваёй сям’і. Дубы сімвалізавалі бацьку і трох сыноў: без вестак прапаўшага ў 1941-ым Георгія, першага дырэктара музея Данілу, які памёр у 1996-ым, і Міхася, які ў студзені адзначыць 90-годдзе. Дрэвы прымушаюць наведвальнікаў узнімаць вочы да вяршынь – у неба… Увасабляўшая жонку і маці – Марыю Дзмітрыеўну – бярозка, на жаль, засохла і была высечана. Памяць аб славутым продку жыве ў душах нашчадкаў. Дарэчы, усе жанчыны роду Якуба Коласа і ў замужжы захоўваюць яго прозвішча – Міцкевіч.

У экскурсіі па музею Ўладыку суправаджалі ўнучкі песняра Вера Данілаўна і Марыя Міхайлаўна. Нявестка, Аляўціна Цімафееўна Міцкевіч, перадала архіепіскапу першае, 12-томнае, выданне збору твораў Якуба Коласа. Дырэктар музея Зінаіда Мікалаеўна Камароўская ўручыла сувенірны гадзіннік з выявай сядзібы. Яна выказала шчырую ўдзячнасць архіепіскапу за ўклад у мемарыяльнае ўвекавечанне памяці песняра (як паведамлялася, па ініцыятыве Ўладыкі ўлетку на старэйшым храме сталіцы Палесся адкрыта мармуровая дошка аб вянчанні Канстанціна Міцкевіча і Марыі Каменскай у Пінску).

У кнізе запісаў ганаровых гасцей пакінуты шчырыя радкі:

“Здзейснілася мая даўнішняя мара пабываць у доме песняра нашага народа Якуба Коласа. Шчыры дзякуй супрацоўнікам музея за захаванне спадчыны народнага паэта, за грунтоўны і даступны аповед аб жыцці і творчасці яго. Спадзяюся і веру, што памяць аб Якубе Коласе будзе жыць у вяках. З любоўю і павагай †Сцяпан, Архіепіскап Пінскі і Лунінецкі. 17 лістапада 2015 года”.