ВЕЧНЫЯ КАШТОЎНАСЦІ ЖЫЦЦЯ

{jcomments on}Кніжная выстава ў храме іконы Божай Маці “Спатоленне пагіблых” (“Взыскание погибших”) г. Лунінец аб’яднала прадстаўнікоў розных пакаленняў.

Выстава прысвечана раўнаапостальнаму Ўладзіміру, 1000-годдзе прастаўлення якога будзем адзначаць у наступным ліпені. Хрышчэнннем старажытнай Русі вялікі князь вызначыў напрамак развіцця ўсходніх славян. Раней братамі-манахамі была створана азбука, каб данесці народам святло запаветаў Збавіцеля. З гэтага часу ў наш лёс увайшлі не толькі імёны Веры, Надзеі, Любові, Софіі (што значыць мудрасць), але і ўвасобленыя ў іх самыя светлыя пачуцці.

---

Да іх заклікаюць лепшыя творы духоўнай і класічнай літаратуры, праз якія выхоўваецца грамадства. Чытанне кніг непарыўна сувязана з бібліятэкамі і іх работнікамі, чыё прафесійнае свята, як і Дзень беларускага пісьменства, адбываюцца ў верасні.

Выданні, прадстаўленыя на выставе, красамоўна адлюстроўвалі палітычную сітуацыю ў былой вялікай краіне, калі атэістычныя ўлады больш чым на 70 год пазбавілі грамадства рэлігійнай асветы. Але людзі, якія праглі духоўнасці, беражліва захоўвалі кнігі ХVIII-XIX стагоддзяў, каб у канцы ХХ-га шчыра перадаць іх тым, хто благагавейна працягне шанаванне прац вялікіх падзвіжнікаў. Менавіта такі каштоўны збор з сямейных бібліятэк былых свяшчэннаслужыцеляў давераны настаяцелю храма іерэю Сергію Крышталю, які сёлета стаў доктарам багаслоўя. Навуковае званне адзначана спецыяльным знакам, які бацюшка ўпершыню прымацаваў на аблачэнне. Гэта стала падставай да развагі сучасным “разумнікам і разумніцам” з гімназіі і сельгаскаледжа, што шлях да “ордэна” (па выказванню прысутных) ляжыць праз засваенне многіх і многіх тамоў мудрых думак.

Работнікі цэнтральнай бібліятэкі Аксана Максімчук і Таццяна Лазько прадставілі старажытныя факсімільныя выданні, што, да гонару нацыі, адноўлены ў наш час. Яны каштуюць вельмі дорага, знаходзяцца на адказным захоўванні, таму дастаўлены ў інфармацыйна-асветны цэнтр храма з дапамогай супрацоўнікаў РАУС (удзячны за садзейнічанне в.а. начальніка Пятру Даніловічу і намесніку Аляксандру Якаўцу). Гэта Ефрасін’еўскае і Слуцкае Евангеллі, Біблія на трох мовах, фотаальбомы, прысвечаныя царственным страстацерпцам і Патрыярху Алексію ІІ, мастацкія ілюстрацыі па сюжэтах Старога і Новага Запаветаў.

Бібліятэкар сельгаскаледжа Ніна Дамашэвіч занатоўвала сустрэчу на відэакамеру. Яе калега з політэхнічнага каледжа Вера Скіба выказала агульную ўдзячнасць айцу Сергію за выдатны ўрок бібліяграфіі, пасля якога хочацца прачытаць не дзве (што лічыцца станоўчым вынікам падобных мерапрыемстваў), а ўсе прадстаўленыя кнігі, таму што кожная значна ўзбагачае святлом новых ведаў.

Паважаныя лунінчанкі з ліку “дзяцей вайны” расказвалі аб няпростым лёсе, аб служэнні веры і захаванні надзеі, што дапамагае з любоўю мудра ўспрымаць цяперашнюю рэчаіснасць. Свае імёны яны атрымалі пераважна ў гонар родных (на памяць аб сустрэчы застанецца фотаздымак з бацюшкай Веры Яўгенаўне Скібе, Надзеі Ільінічне Туркевіч, Любові Карпаўне Дывыдчык, Софіі Рыгораўне Псёл). Натуральным прыкладам не толькі пераемнасці пакаленняў, але і духоўнага выхавання юных сучаснікаў стала выказванне аднаго з навучэнцаў каледжа:

–Хаця я нарадзіўся 8 сакавіка, па прапанове бабулі назвалі Паўлам. Бачыце, захоўваю ў кішэні абраз двух апосталаў, а дзень анёла святкую 12 ліпеня…

Рэдка цяпер сустрэнеш дзяўчынак з імёнамі-пачуццямі. Праўда, свяшчэннік адзначыў, што Таінства Хрышчэння часта прымаюць Сафійкі, а сёлета дзвюх нованароджаных назвалі Вера. Дай Бог, каб разам з імёнамі наша грамадства набывала тыя высакародныя рысы, што ўвасоблены ў святых. На памяць удзельнікам сустрэчы ўручаны іконкі святога Ўладзіміра, з якога пачаўся цывілізацыйны выбар нашай зямлі…