ЛІЛЕІ НАГАДАЮЦЬ АБ ПАЭТЦЫ…

У інфармацыйна-асветным цэнтры пры Лунінецкім храме іконы Божай Маці “Спаталенне загіблых” адбылася літаратурная праграма, прысвечаная памяці мясцовай творцы Вольгі Аляшкевіч.

Паэтка, якая завяршыла зямны шлях 9 год таму, была “залатой” выпускніцай-1994 СШ №1 г. Лунінца. Яна штогод вяртаецца да нас вершамі. Асабіста не ведалі аўтара многія сучаснікі, але як пранікнёна гучалі малітоўныя радкі ў іх выкананні! У праграме, якую правяла старшыня раённага савета ветэранаў педагагічнай працы Наталля Іванаўна Казанкова, прынялі ўдзел вучаніцы СШ №2: Ангеліна Кавалец, Аня Якубовіч, Валерыя Дубойская (усе – 6-ы клас), Святлана Калесніковіч (7-ы) і Вольга Бача (8-ы), прадстаўнікі СШ №4 – 9-класнік Вячаслаў Арэхва, настаўніцы Вольга Сцяпанаўна Грыдзюшка, Валянціна Рыгораўна Жаўнерык, Ганна Міхайлаўна Шалай.

---

 

Творчаць заўчасна згаснуўшай лунінчанкі высока ацанілі вядомыя паэты. На сустрэчы да іх меркаванняў далучыўся член Саюза пісьменнікаў Андрэй Мазько. Зборнік Вольгі Аляшкевіч у яго руках раскрыўся на старонцы з сімвалічнымі радкамі:

Мне снилось, как молюсь я в церкви русской,
Не счастья, а терпения прошу,
Чтоб не было в душе темно и пусто,
Чтоб не забыть, зачем я крест ношу…

Андрэй Іванавіч лічыць, што паэтка была не па ўзросту мудрай, дасягнуўшы ў сваёй творчасці глыбінь чалавечай душы і вышынь чалавечага духу. У памяць Вольгі ён парчытаў сваю “Малітву”… Вядома, што духоўным настаўнікам дзяўчыны стаў іерэй Сергій Крышталь. Настаяцель храма ўручыў іконы і кнігі ўдзельнікам сустрэчы, адзначыўшы:

– У Бога нічога не бывае выпадковым. Паэтка нарадзілася ў красавіку, напярэдадні Дабравешчання. Святам стала біблейская падзея, калі Архангел Гаўрыіл звярнуўся да Марыі: “Багародзіца, Дзева, радуйся…”. З малітвай Вольга адышла да Госпада 26 ліпеня – у дзень гэтага ж святога. Праз два гады ён стаў адметным для нашага храма – здзейснілі закладку новай царквы. Звярніце ўвагу на ікону Архангела Гаўрыіла – ён заўсёды трымае ў руках лілею…

Шчырую ўдзячнасць дзецям і дарослым выказала мама паэткі – Галіна Алікаўна Аляшкевіч. Падораныя ёю ў памяць пра Вольгу зацвітуць каля храма лілеі.